Rom 14 | KYG | STEP | Mago konagatapimogimo Goti ge'ae'mo lokiya vai'a apakesa afi'a fatago nosisaya konagatapimogi siosifi'mo apavalelitapa eyo. Lapakaemo ge hapaisage'apae'mo alu apakesa afisayafe'mo apavalelita o'metapa fiku apavalelitapa eyo.

Romans 14

Konagatapimogi yu'ilaga mafa'ne'apie'mo alitapa fako osiyo, huno hu'niya gemae

1 Mago konagatapimogimo Goti ge'ae'mo lokiya vai'a apakesa afi'a fatago nosisaya konagatapimogi siosifi'mo apavalelitapa eyo. Lapakaemo ge hapaisage'apae'mo alu apakesa afisayafe'mo apavalelita o'metapa fiku apavalelitapa eyo. 2 Mago vaya'mogi apakesa afi'a fatago nehu'apae'mo, muki agufa ne'ya'mo afa'a negaune, hu'a nehage'apae'mo mago lokiya vai'a apakesa afi'a fatago nosaya vaya'mogimo ame'amo no'nae. 3 Muki agufa ne'ya'mo afa'a ne'naya vaya'mogimo ame'amo no'naya vaya'aife'mo, ina agufa vaya'mo mai'nae, hu'a osisaya kava'mo hane'niye. Goti'a muki agufa ne'ya'mo ne'naya vaya'mo afa'a apavale'niya'mofe'mo ame'amo no'naya vaya'aife'mo, hosu kava'mo nehae, hu'a osisaya kava'mo hane'niye. 4 Ina lagitapamo mago ali'ya aepa vekae'mo ali'ya'amo ne'aliya vekae'mo, hosu kava'mo nehiye, hutapa alita fako hutapa ne'atae. Agaemo ali'ya aepa vekamo'a agai'amo alino fako huno ne'ateno'ae'mo, he tino lokiya vaino mai'niye, huno hisifi ago asagauno ai'niye, huno hisifi agai'a yane. Goti'a afa'a alino he tino ategaiya'mofe'mo he tino maigiye.

5 Mago vaya'mogimo mago afinafe'mo, aote afina'mo hane'niye, hu'a apakesa ne'afige'apae'mo mago vaya'mogimo, muki afina'mo magoke agufa afina'age'mo hane'niye, hu'a apakesa ne'afiye. Muki vaya'mogi, aote afina'mo hane'niye, hu'a nehafi magoke agufa afinane, hu'a nehafi hu'a nehisayana apakai'apimo apamete apamete hu'a lole apakesa o'afi'a magoke apakesa afisaya kava'mo hane'niye. 6 Mago vaya'mogi Ala kava nefe'mo apakesa afi'ne'apae'mo, aote afina'mo hane'niye, hu'a nehae. Ame'amo ne'naya vaya'mogi Ala kava nefe'mo apakesa afite'a ne'ne'apae'mo Gotifeke'mo haoke nehae. Ame'amo no'naya vaya'mogi Ala kava nefe'mo apakesa afite'apae'mo Gotifeke'mo haoke nehae. 7 Afa'a mai'netae'mo lagaitilefe'mo no'maune. Falisunana lagaitilefe'mo ofaligune. 8 Afa'a mai'netae'mo Ala kava netefeke'mo ne'maune. Falisunana Ala kava netefeke'mo faligune. Afa'a mai'nopi falisupi huta Ala kava ne'mo vaya'amo mai'none. 9 Kalaisi'a fali'naya vaya'e afa'a mai'naya vaya'mogi'e'mo kava veka'apimo maisiyafe'mo ago faliteno he ti'niye. 10 He ti'niya'mofe'mo konagatapimogi nehaya kava'mo alita fako hutapa ne'apataya vayanagi na kava higetapae'mo ani kava'mo nehae. Konagatapimogife'mo ina agufa vaya'mo mai'nae, hutapa nehaya vayanagi na kava higetapae'mo ani kava'mo nehae. Kalaisi'a sia'ale'mo fai mai'neno'ae'mo kavatimo alino fako huno latesiyafe'mo muki'amogita haita aulagale'mo he tita maigune. 11 Goti mukufi'mo hane'niya gee'mo Ala kava ne'mo'a huno'ae'mo,

Nagi'nileti'mo lama ge nehuve. Muki vaya'amogi nagaetegamo e'a apale'ya fai'ne'apae'mo, Gotigamo alika fako huka latesana vekamo mai'nane, hu'a ae'a hakalo hu'a naha paigae,
huno hu'niye. 12 Inagi muki'amogita lamete lamete huta Gotife'mo, ma kava hu'nove, ina kava hu'nove, huta ge ha paigune.

13 Ha paiguna'mofe'mo konagatimogi kava'apimo mago'e huta alita fako osuta atalegetao. Konagatimogi apaiyafi'mo hapaesige'a heleve hu'a hosu kavapi'mo asagau'a aisayafe'mo mago kava'mo afa'a osugune, huta lagesa afigetao. 14 Nagaemo Ala kava ne'mo Yesupi'mo mai'ne'nae'mo muki ne'ya'ae'mo, hosu ne'ya'mo ohane'niye, hu'na ago afi'nove. Afi'nova'monanafa mago vaya'mogi ne'yafe'mo, hosu ne'ya'mo hane'niye, hu'a apakesa ne'afisayana apakai'apilefe'mo hosu ne'ya'mo hane'niye. 15 Lapakaemo ne'ya'mo ne'naya kavateti'mo konagatapimogimo alita hosu hutapa ne'apatesayana lapau lapayamopafi'mo nolapaiye. Fiku yanagetapa ne'ya'mo ne'naya kavateti'mo Kalaisi'a falino apate'niya konagatapimogi alita hosu hutapa apategae. 16 Mago vaya'mogi, alagepa kava'mo nehune, hu'a nehaya kavatefe'mo hosu kava'mo nehae, hu'a hisaya agufa ka'mo lapakaemo valitapa o'apateyo. 17 Na kava higetapaene. Goti'a ne'ya'e ani'e'mo ne'naya kavate'mo yagaino no'apatefa Goti Auneme'amo'mo laipafi'mo mai'nigeta fatago kava'mo nehunageno'ae'mo laipamo'mo falu hu'nisigeta lamogaga aisuna kavateke'mo yagaino nelate. 18 Vaya'mogi ani kava nehu'a Kalaisi ali'ya'amo ne'alisayana Goti'a amuse huno ne'apatege'a muki vaya'mogi'e'mo amuse hu'a ne'apatae.

19 Amuse huno ne'apateya'mofe'mo magoke laipa lagesamo ali'neta alita lokiya vaita apatesuna kava'mo hisunafe'mo layamukiki higetao. 20 Lapakaemo ne'yafeke'mo lapakesa afitetapa vaya'ai apaipafi'mo Goti ali'ya'amo alita hosu hutapa o'ateyo. Muki ne'ya'amo alagepa huta nesuna ya'mo hane'niya'monanafa lapakaemo mago ne'ya'mo ne'naya'mofe'mo mago vaya'mo asagau'a aisayana lapakaemo hosu kava'mo nehae. 21 Lapakaemo konagatapimo asagau'a o'aisayafe'mo ame'amo o'nege lokiya ani'mo nofi alagafati ani'mo o'nege muki agufa kava'mo alita hosu hutapa apatesaya agufa kava'mo osuge nehisayana alagepa kava'mo nehae. 22 Ani kavatefe'mo lapakesa afita fatago nehaya kava'mo alita lapaipafi'mo malegeno Goti aulagale'mo haneno. Vaya'mogi nehaya kavafe'mo lole apakesa o'afi'a, alagepa kava'mo nehune, hu'a apakesa ne'afiya vaya'mogi apamogaga ne'aiye. 23 Ne'aiya'monanafa lole apakesa afi'ne'a ne'nesaya vaya'mogi hosu kava'mo nehae. Nehaya kavafe'mo alagepa kava'mo nehune, hu'a nosisayana apakesa afi'a fatago nosaya'mofe'mo hosu kava'mo nehae. Muki kava'mo nehutae'mo, alagepa kava'mo nehune, huta osuta fiku nehisunana ani agufa kavatimo hosu kava'mo nehune.